परिवहन मंत्री प्रताप सरनाईक आणि तांडा समृध्दी योजना समितीच्या पाठपुराव्याला यश
ठाणे (प्रतिनिधी) : राज्यातील प्रमुख महामार्ग म्हणून ओळख असणाऱ्या मुंबईतील घाटकोपर ते खारेगाव ठाणे या महामार्गाला हरित क्रांतीचे जनक माजी मुख्यमंत्री स्वर्गीय वसंतराव नाईक यांचे नाव आहे मात्र प्रशासनाच्यावतीने याठिकाणी नावाचे फलक लावण्यात आले नव्हते. त्यामुळे वसंतराव नाईक महामार्ग नावाचे मोठे फलक लावण्याची मागणी संत सेवालाल बंजारा लबाना तांडा समृध्दी योजना ठाणे जिल्ह्याच्यावतीने सार्वजनिक बांधकाम विभाग, कोकण विभागाकडे करण्यात आली होती. त्यानुसार परिवहन मंत्री प्रताप सरनाईक यांनी संबंधित विभागाकडे पाठपुरावा करत ठाणे जिल्हा अशासकीय सदस्य अनिल राठोड यांची मागणी त्वरित पूर्ण करा असे पत्र दिले, त्याचप्रमाणे संबंधित उपायुक्ताला फोन करून त्वरित प्रक्रिया करण्याचे निर्देश दिले होते. त्यानुसार तीन हात नाका येथील महामार्गाला माजी मुख्यमंत्री वसंतराव नाईक महामार्ग असे मोठे फलक लावण्यात आले आहे. या फलकाचे उद्घाटन तांडा समृध्दी योजना ठाणे जिल्हाच्यावतीने करण्यात आले आहे. ठाण्यातील समस्त बंजारा समाजाच्यावतीने परिवहन मंत्री प्रताप सरनाईक यांचे आभार व्यक्त केले असल्याचे अशासकीय सदस्य अनिल राठोड यांनी सांगितले.
संत सेवालाल बंजारा लबाना तांडा समृध्दी योजनेचे ठाणे जिल्हा सदस्य अनिल राठोड म्हणाले की, आम्ही २०२४ रोजी तीनहात नाका येथील महामार्गावर स्वर्गीय वसंतराव नाईक यांच्या नावाचा मोठा बोर्ड लावण्यात यावा आणि त्यासंदर्भात एक पत्र राज्य सार्वजनिक बांधकाम विभाग आणि ठाणे महापालिकेच्या सार्वजनिक बांधकाम विभागाला दिले होते. त्यानंतर परिवहन मंत्री प्रताप सरनाईक यांना आम्ही कोकण विभागाचे अशासकीय सदस्य पत्रकार कविराज चव्हाण, सेवा फाउंडेशनचे अध्यक्ष माजी उपायुक्त प्रकाश राठोड यांच्यासह बंजारा समाजाचे मोठे शिष्टमंडळ जाऊन भेटलो. तांडा समृध्दी योजनेच्या माध्यमातून दिलेल्या या पत्राची दखल घेत मंत्री सरनाईक यांनी सार्वजनिक विभागाच्या अधिकाऱ्याला तत्काळ कळवत संबंधित मागणीवर त्वरित काम करण्याची सूचना दिली. त्यानुसार आम्ही पाठपुरावा केला आणि स्वर्गीय वसंतराव नाईक यांच्या जयंतीच्या दिवशी महामार्गावर हे मोठे फलक बसविण्यात आल्याचे राठोड म्हणाले.
परिवहन मंत्री प्रताप सरनाईक यांनी केलेल्या मदतीमुळे आणि ठाणे जिल्हा अशासकीय सदस्य अनिल राठोड यांच्या पाठपुराव्यामुळे तीनहात नाका येथे माजी मुख्यमंत्री वसंतराव नाईक महामार्ग असे मोठे बोर्ड लागले. या बोर्डाचे उद्घाटन तांडा समृध्दी योजनेचे अशासकीय सदस्य आणि सेवा फाउंडेशनचे अध्यक्ष प्रकाश राठोड यांच्या उपस्थित झाले. यावेळी संत सेवालाल महाराज आणि स्वर्गीय वसंतराव नाईक यांच्या जोरदार जयघोषाने महामार्ग दणाणले तसेच सर्वांनी मंत्री प्रताप सरनाईक यांचे आभार मानले.
