बूटामध्ये लपवून आग्रा प्रिंटिंग प्रेसमधून महाराष्ट्र टिईटीची प्रश्नपत्रिका लीक

मुंबई : महाराष्ट्र शिक्षक पात्रता परीक्षेची (TET) प्रश्नपत्रिका उत्तर प्रदेशातील आग्रा येथील एका प्रिंटिंग प्रेस मधून लीक करण्यात आली होती. ठाणे पोलिसांच्या विशेष तपास पथकाने (SIT) या आंतरराज्यीय पेपर-लीक रॅकेटचा पर्दाफाश करताना असे उघड केले की, प्रिंटिंग प्रेसच्या कर्मचाऱ्यांनीच ही प्रश्नपत्रिका बाहेर चोरून नेली होती. प्रेसबाहेर ती नेण्यासाठी ते प्रश्नपत्रिका आपल्या बूटामध्ये लपवून ठेवत असत.

एसआयटीच्या माहितीनुसार, दिल्लीत कॉर्पोरेट कार्यालय आणि आग्रा येथे प्रिंटिंग प्रेस चालवणारी ही कंपनी अनेक वर्षांपासून महाराष्ट्र शिक्षण विभागासाठी परीक्षेच्या प्रश्नपत्रिका छापत होती. याव्यतिरिक्त, इतर अनेक महत्त्वाच्या राष्ट्रीय परीक्षांची गोपनीय कागदपत्रेही या प्रेसमध्ये तयार केली जात होती. इतकी संवेदनशील जबाबदारी असूनही, या प्रेसमध्ये सुरक्षेच्या मूलभूत उपाययोजनांचाही अभाव असल्याचे तपासात समोर आले. तपास अधिकाऱ्यांनी सांगितले की, प्रेसच्या अनेक महत्त्वाच्या ठिकाणी सीसीटीव्ही कॅमेरे बसवण्यात आले नव्हते. तसेच, कर्मचाऱ्यांच्या हालचालींवर योग्य देखरेख किंवा तपासणीची कोणतीही व्यवस्था नव्हती. या निष्काळजीपणाचा फायदा घेऊन, गोपनीय कागदपत्रे बूटामध्ये लपवून सहजपणे बाहेर नेली जात होती.

पोलिसांचा आरोप आहे की, प्रेसचे दोन कर्मचारी बाबूलाल कुशवाह आणि नरेश महाौर उर्फ निकी यांनी टीईटीची प्रश्नपत्रिका चोरली आणि ती त्यांचा माजी सहकारी सोनू कुमार दिवाकर याच्याकडे सोपवली. सोनूने प्रश्नपत्रिकेची फोटोकॉपी काढून घेतली आणि मुख्य सूत्रधार बिजेंद्र गुप्ता याच्या सांगण्यावरून त्या इतर साथीदारांपर्यंत पोहोचवल्या. त्यानंतर, या व्यक्ती प्रश्नपत्रिका विकण्यासाठी महाराष्ट्रात आल्या. सोमवारी भिवंडी न्यायालयात शरण आल्यानंतर एसआयटीने सोनू कुमार दिवाकर याला अटक केली. आज त्याला न्यायालयात हजर करण्यात आले, यावेळी न्यायालयाने त्याला 2 ऑगस्टपर्यंत पोलीस कोठडी सुनावली आहे.

      तपासात असेही समोर आले की, सोनूने 2018 मध्येच कंपनी सोडली असली तरी, तो मुख्य सूत्रधार बिजेंद्र गुप्ता याच्या सतत संपर्कात होता. तसेच तपासादरम्यान एसआयटीला हे देखील समजले की, फरार संशयितांपैकी एक जण, जो पुण्याचा रहिवासी आहे, तो महाराष्ट्र सरकारचा चतुर्थ श्रेणी कर्मचारी आहे. पोलिसांनी सांगितले की, त्याने लीक झालेली प्रश्नपत्रिका मिळवण्यात विशेष रस दाखवला होता. तो अशा सुमारे 50 उमेदवारांच्या संपर्कात होता, जे प्रश्नपत्रिका खरेदी करण्यास तयार होते, असा संशय एसआयटीला आहे. त्यामुळे बिजेंद्र गुप्ता याच्या अटकेमुळे किती उमेदवारांना लीक झालेली प्रश्नपत्रिका मिळाली होती, हे उघड होण्यास मदत होईल. दरम्यान, या प्रकरणातील अधिक पुरावे गोळा करण्यासाठी एसआयटीने मुख्य आरोपी बिजेंद्र गुप्ता याला बिहारमधील समस्तीपूर येथे नेले आहे.